Wednesday, June 13, 2018

වැළපෙන්නිය


මරීයා* නම් ඔබය
ස්වර්ගයේ දොර වැසුණ
සදාකල් මෙලොව
පරලොව අතර සිරකෙරුණ
නොනවතින වැළපුමක
ඉඳහිටක ඉකිගැසුන
කාලයේ ඉම තෙක්ම
ඇවිද යනු! අණ ලැබුන


ලිහීඑන සළුව ඇඳ
දරු දරාගෙන යනෙන
හඬා බිහිසුණු හඬින්
අංකිරට පැන දුවන
සාපලත් පරපුරට
තාම දිවි දොස් ගෙනන
ලිහිණි හෙළ පතුලෙ ඉඳ
අඬගසන හඬ අසන


ඔබේ සොයුරියෝ වෙති
එක කුසක නොඉපදුන
ලොවෙහි දෙකොණක උවද
එකම කොණ උරුම වුන


(* La Lorona නොහොත්  වැළපෙන්නිය යනු මෙක්සිකානු පුරාවෘතයකි.
සිය සැමියා විසින් රවටනු ලැබීම නිසා උපන් මහත් සිත්වේදනාවෙන්  දරු දෙදෙන
ගඟකට විසිකර තමන්ද එහිම පැන දිවි තොර කරගත් මරීයා නම් දුගී තරුණියක
ඉනික්බිති අවතාරයක් ලෙස වැළපෙමින් ඇවිදින බව එහි සවිස්තරය.
දරුවන් සොයා ඇවිදින ඇගේ වැළපුම් හඬ අසන්නට ලැබුනහොත් මහා ඛේදවාචකයක්
අතළඟ බව මෙක්සිකානුවෝ අදහති )

සිතුවම - Juana Alicia 



ගෝලයාගේ කවිය


නවා දණ වඳින විට පිටත් වී යන වෙලේ
කතා නැති ගුරු තරුව බොඳවුනා කරුවලේ
නොපා අත කිසිවෙකුට දිවි සටන දිනු වෙලේ
එපා හිත හූරන්ඩ ඇයි එහෙම මට කලේ


ඉස්සරහ පේලි වල හිටි දුවන පන්තියේ
අස්සයින් දුර ගියා සිප්ලැබූ සන්දියේ
මාළුවෝ මං වගේ කකුල් නැති ගැංසියේ
පීනන්ඩ පුරුදුවුනෙ තනියෙමයි හංදියේ


නොයෙක් හණගැසූ දඬුමොණර වල තටුගසන
කොතෙක් අය පැමිණේද දාර හොට බිම ඇණුන
උනුත් ඔය වගේමයි ඇඳුනුවත් නොහඳුනන
මජං ඔය හැටි විසද මචං කියපං ඉතින


ගෝල-ගෝලයින් මිස ග්‍රීස්මෙත් ටයි බඳින
පොතේ නැති විදියකට හිතේ හැටියට හිඳින
අපේ ජීවිත එකම අපායක් ලෙස දකින
දිසාපාමොක් මොටද කරේ හණමිටි දරන

Friday, April 13, 2018

අවුරුද්ද එනකොට



නොයෙක් සිනහ සිහිවී පැමිණි ගම  රට 
මසක් වටින පඩි පත මිටක දිය    කොට
නොතිත් දන සරන මහ නුවර      වටපිට
ඩමිත් හෙලුවෙන් ය අවුරුද්ද එනකොට

Thursday, March 1, 2018

අං පාර


හැම රෑම හීනෙකින් - කර ඇඹෙන හැටි දකින
කඩුලු කඹ කඩාගෙන - පනින ඇන ඇන දුවන
හති වැටී නතරවී - හණගැසූ තැන කසන
අං පාර (නො)වැරදුන - බෝ හිසින ලේ ගලන  

කුළුණු කලු වලාකුළු දුමට ඉහළින් නැගුන
හිස්කරත් මුදු බරැති හැඟුම් පොදි ලෙහි රැඳුන
වියරු ඇස ගැටුනු කල වන වදුල තෙත හිඳුන
හලයි ගිනි අඟුරු යලි ගෙයි උඳුන්වල රැකුන


Monday, November 20, 2017

අංකූරෝ


හ්‍යුමස් රසට කෑදර 
තෘණ බුමුතුරුණු අතහැර
නොනැවත මතුපිටින්
කිඳා බසිනුව පහලට
රලු ගල් බොරලු  විනිවිද

මුතු මැණික් 
‍රන් නිදන් නම් නොව
මුල් ගැටෙනු නියමිත,
මිනී ඇට කඳු ම ය
බොහෝ වධ විඳ වැළලුණ
අසාගන් ඒ හැමවිට 
කතා හැම උන් මුමුණන

වැඩී අතු හැම අත
නිවා සනහන සව්සත
උඹ මහ ගහක් වනු ඇත
ලපැටි අංකුර හිතවත


(Painting by Ion vincent)
Related Posts Plugin for WordPress, Blogger...