Wednesday, June 13, 2018

වැළපෙන්නිය


මරීයා* නම් ඔබය
ස්වර්ගයේ දොර වැසුණ
සදාකල් මෙලොව
පරලොව අතර සිරකෙරුණ
නොනවතින වැළපුමක
ඉඳහිටක ඉකිගැසුන
කාලයේ ඉම තෙක්ම
ඇවිද යනු! අණ ලැබුන


ලිහීඑන සළුව ඇඳ
දරු දරාගෙන යනෙන
හඬා බිහිසුණු හඬින්
අංකිරට පැන දුවන
සාපලත් පරපුරට
තාම දිවි දොස් ගෙනන
ලිහිණි හෙළ පතුලෙ ඉඳ
අඬගසන හඬ අසන


ඔබේ සොයුරියෝ වෙති
එක කුසක නොඉපදුන
ලොවෙහි දෙකොණක උවද
එකම කොණ උරුම වුන


(* La Lorona නොහොත්  වැළපෙන්නිය යනු මෙක්සිකානු පුරාවෘතයකි.
සිය සැමියා විසින් රවටනු ලැබීම නිසා උපන් මහත් සිත්වේදනාවෙන්  දරු දෙදෙන
ගඟකට විසිකර තමන්ද එහිම පැන දිවි තොර කරගත් මරීයා නම් දුගී තරුණියක
ඉනික්බිති අවතාරයක් ලෙස වැළපෙමින් ඇවිදින බව එහි සවිස්තරය.
දරුවන් සොයා ඇවිදින ඇගේ වැළපුම් හඬ අසන්නට ලැබුනහොත් මහා ඛේදවාචකයක්
අතළඟ බව මෙක්සිකානුවෝ අදහති )

සිතුවම - Juana Alicia 



ගෝලයාගේ කවිය


නවා දණ වඳින විට පිටත් වී යන වෙලේ
කතා නැති ගුරු තරුව බොඳවුනා කරුවලේ
නොපා අත කිසිවෙකුට දිවි සටන දිනු වෙලේ
එපා හිත හූරන්ඩ ඇයි එහෙම මට කලේ


ඉස්සරහ පේලි වල හිටි දුවන පන්තියේ
අස්සයින් දුර ගියා සිප්ලැබූ සන්දියේ
මාළුවෝ මං වගේ කකුල් නැති ගැංසියේ
පීනන්ඩ පුරුදුවුනෙ තනියෙමයි හංදියේ


නොයෙක් හණගැසූ දඬුමොණර වල තටුගසන
කොතෙක් අය පැමිණේද දාර හොට බිම ඇණුන
උනුත් ඔය වගේමයි ඇඳුනුවත් නොහඳුනන
මජං ඔය හැටි විසද මචං කියපං ඉතින


ගෝල-ගෝලයින් මිස ග්‍රීස්මෙත් ටයි බඳින
පොතේ නැති විදියකට හිතේ හැටියට හිඳින
අපේ ජීවිත එකම අපායක් ලෙස දකින
දිසාපාමොක් මොටද කරේ හණමිටි දරන

Related Posts Plugin for WordPress, Blogger...