පෙත් මඟක මගියෙක්

ඉමක් නොපෙනෙනා පෙත් මඟ

නිමක් නොදන්නා ගමනක

අව් වැහි යට සිනහමුවින

තනිකර මිනිහෙක් දුර යන

කඳු පල්ලම්

බැස නගිමින

නැග බසිමින

යළි නගිමින

උජාරුවෙන් ඔජවඩමින්

ඉගිලෙන තරු ඉදිඹුවෙකුට

සෙවල හලාගෙන දිව එන

ගොලුබෙලි-හංගොලු කෙනෙකුට

ඉඩ දී අයිනකට වෙමින

හෙමින් යදඬු පා ඔසවන

මඟ අයිනක පිපී නටන

සුවඳ පාට මල් මූණක

සිනිඳු ගතිය ළඟ පමණක්

ඉඳහිට හෝ පය නවතින

වළාකුළක් ඉහලාගෙන 

මීදුමෙන් ජටා පළඳින

හඳ පලුවක හැඩ එලියෙන්

රෑටත් ඉර අරගෙන යන

ඉමක් හොය හොයා පෙත් මඟ

නිමක් දකිනු රිසි ගමනක

අව් වැහි යට සිනහමුවින

තනිකර මිනිහෙක් දුර යන