Tuesday, September 12, 2017

ඉනික්බිති


වසාලයි ඔබ පැමිණ
ඒ සියලු කුස්තූර
මහද බිත පුරාවට
කැතට විසිරී තිබුණ

පෙඳ පාසි අතර පිපි
පෙනෙන නොපෙනෙන පුෂ්ප
දැනෙන නොදැනෙන තරම්
ක්ෂුද්‍ර සුවඳක් සැදුව
නිදාහුන් ලැගුම්හල,

වැසී යයි එකින් එක
තැවරෙමින් සෙනේ දිය
බදාමය සේ සැදී
සියුමැඟිලි තුඩ මිදෙන

පිරියම් ව සුද මැදී
ඔප වැටී තිබෙන සඳ
අසයි ඔබ
සොයම් මම

ඒ කුඩා කුසුම් ඉඩ

Saturday, May 20, 2017

ලොවෙන් අඩක් තනි යායකි


රෑ දවසෙත් ඇහේ ඇනෙයි
ගනකම් අඳුරෙන් ඉස්සී
වැට කොටු කටු කම්බි පවුරු
හඳ දැක ඇහැරුන ගැස්සී
අමාවකේ වළා ගලා
තරු ගිනි පුපුරු ද හිස් වී
ලොවෙන් අඩක් තනි යායකි
කලුවර යට කැටිගැස්සී




අරුණෝදය


සුදු වළා
රෑ ඇඳුම අතරින් 
සීතලේ එසැවුණු
අඳුරු පැහැ ගිරි තුඩු..


අනුරාගිකය
අරුණෝදය..

Saturday, March 11, 2017

විල් තෙම


මුහුණටම වීසිකල
ලොකු කුඩා කැට කැබලිති
ග්ලුප් හඬින් ගිලදමන
ඉගැඹුරු සුනිල විල්තෙම


සියුම් දිය රැල්ලකි
ගැටෙනා තැනින් ඉපදෙන
මඳ දුරක් දිවගොස්
බොඳවී මැකීයන


නැත අන් සලකුණක්
ඒ කිසි මිනිස් වෙහෙසක
මඳ මඳ ඉහල එසැවෙන
දිය කඳ පමණි අපමණ





ඍතුවෙන් ඍතුවට..



අප්‍රියෙල් අහස ඉඹ
පිපිරිලා කැබලිවෙමි
වෙසක් හුළඟක ඇලී
තැන නොතැන විසිර යමි
නිකිණි හිරු අබිමුවෙහි
උණුව දියවී ගලමි
දුරුත්තේ හීතලට
නිවී යළි කැටිගැහෙමි

ඒ කිසිම තොරතුරක්
කිසිවිටෙක නොසඟවමි
මුදා විසිතුරු සලුව
අගුලු නැති දොර හරිමි

මිදෙන මං පෙනි පෙනී
සුවපහසු මිහිදුමක
පටලැවෙමි..
Related Posts Plugin for WordPress, Blogger...