විහඟෙකු දුටුවා ද?

පැණි පිරුණු මල් වලට වාගේම 

පැණි උරන සමනලුන්ටත් පෙම් කල 

දවසකට දෙකකට අත්විඳි 

අපරිමිත ප්‍රේමයක් පිලිබඳ 

එපාවෙන තරමට ගී කියන 

කටකාර විහඟෙකු දුටුවා ද?

අසම්මත හීන දුටු වරදට 

පින්කාර අත්වලින් 

ගල් මුගුරු පහර දී 

කටු ඔටුනු පැළඳ වූ 

කුරුසිපත් නොකළ මුත් 

හදවතට ඇණ ගැසූ 

පව්කාර විහඟෙකු දුටුවා ද?

මේ කර්කශ ම ඍතුවේ 

කලාතුරකින් හමුවෙන 

කොළපාට තුරු පතක් ගානේ 

තුඩින් ඇන ඇන ලියන 

අදහන්න බැරි ඇත්ත 

අකුරෙන් අකුර අමුණන 

කවිකාර විහඟෙකු දුටුවා ද?