හිතමිතුරු හැම්ස්ටර්

නිශා නිසොල්මන් පාලුව බිඳින්නේ
සලා ‘දැකුලු මල්’ පෙති බිම හෙලන්නේ
දිරූ සීලිමේ දඟ කර පනින්නේ
කෘන්තක මූණ පටු යහනට පෙනෙන්නේ

ඉතා දුබල සිග්නල් කණු බිඳුන රට
නිවී විදුලි සැර රවුටර නිදන විට
දවා අවට සියොලඟ ගිනි නැගෙනකොට
උඹේ නිය පහුර සිහිවී රිදුණි මට

දාහක් උගුල් පාසානම් අතරින්නේ
දාහක් යොදුන් දුර ගෙවමින් දිව එන්නේ
දාහක් කාසි හපකර දත මැදගන්නේ
දාහක් වෙරලුමල් මැදියම පූදන්නේ

නැවී බිමට හිරිමල් මල් නටන තුරු
හැබෑවටම රොන්සුණු මුව ගැටෙනතුරු
සැදී යහන්ගැබ කිරි - කිරි නැගෙන තුරු
සදා අත නොහැරි අත ඒ හිත මිතුරු